25 வாக்குறுதிகள் - எட்டாம் வாக்குறுதி

அல்லாஹ் தீமையை முற்றிலும் அழிப்பான்.

அல்லாஹு சுப்ஹானஹுவத ஆலா தன் திருமறையில் கூறுகின்றான்,

"ஆகவே, எவர்கள் ஈமான் கொண்டு நல்ல அமல்கள் செய்கிறார்களோ அவர்களுடைய தீங்குகளை அவர்களை விட்டும் நிச்சயமாக நீக்கி விடுவோம்; இன்னும், அவர்கள் செய்த நன்மைகளுக்கு அவற்றைவிட மிக்க அழகான கூலியை, நிச்சயமாக நாம் அவர்களுக்கு கொடுப்போம்." (திருமறை 29:7)

விளக்கவுரை:
அல் ஜன்னாஹ் (அ) சுவனம் என்பது தூய்மையான இடமாகும். எனவே தூய்மையான மக்களை மட்டுமே அதில் அனுமதிக்கப்படும். தூய்மையற்றவர்கள் இதி போக இயலாது.

ஆதமின் மக்கள் அனைவரும் பாவம் செய்பவர்களே. இதில் பாவத்திலிருந்து விலக்கப்பட்டவர்கள் என எவரும் இலர். நாமெல்லோருமே தீங்கிழைத்து தீங்கிழைத்து நம் ஆன்மாவில் அழுக்கேற்றியவர்கள்தான், நம்மில் ஒவ்வொருவருமே எனில் நாம் எவ்வாறு இந்த பாவங்களை துடைத்துவிட்டு தூய்மையாக முடியும்?

கீழ்க்கண்ட வழிகளின் மூலமாக நாம் தூய்மை அடையலாம்.

• தவ்பா (பாவமன்னிப்பு தேடுதல்)
• இஸ்திக்ஃபார் (அல்லாஹ்விடமிருந்து மன்னிப்பை எதிர்நோக்குதல்)
• நோய்கள் கூட பாவங்களிலிருந்து நம்மை தூய்மைபடுத்தும், அந்த நேரத்தில் பொறுமையை கைக்கொண்டால்.
• அதே போல் இன்னல்களும் துயரங்களும் இன்னும் அனைத்து ஃபித்னாக்களையும் பொறுமையுடனும் இறைதிருப்தியுடனும் சந்திக்கும்போது நம் பாவங்கள் நம்மை விட்டு விலகுகின்றன.

எவ்வாறு நோக்கினும் நம் பாவங்களை கழுவிட ஓர் செயல்முறை அல்லது ஒழுங்குபடுத்தப்பட்ட ஓர் வழிமுறை வேண்டும். அல்லாஹ்விற்கு மிகவும் பிடித்தமான அடியான்கள் இருக்கின்றனர். அல்லாஹ் அவனின் ரஹமத்தை அவர்கள் மீது காட்ட விழையும்போது இவ்வுலகில் (அந்த அடியான்களின்) பாவத்தை மறைத்துவிடுகின்றான், அதே போல் மறுமையிலும் அப்பாவங்களை மறைத்துவிடுகின்றான். ரசூலுல்லாஹ்(ஸல்) அவர்கள் கூறினார்கள்," ஒரு மனிதனை தீர்ப்பு அளிக்கப்படும் அந்நாளில் அழைத்து வரப்படும். அவன் முழங்கால்கள் பதற்றத்தில் நிலைகுலைந்து ஆடிக் கொண்டிருக்கும், அந்நேரத்தில் அவனின் ஏடு அவன் முன் கொண்டுவரப்படும். அவனுக்கு தான் செய்த குற்றங்கள் தெரியும், ஏட்டினை படித்துக் கொண்டே போவான், அனைத்து பாவங்களும் அதில் பதியப் பெற்றிருப்பதை காண்பான், சில பெரிய பாவங்களைத்தவிர. எனவே அவன் அல்லாஹ்வை நோக்கி, யா அல்லாஹ் என்னுடைய சில பாவங்களை நான் இந்த ஏட்டில் காண‌வில்லையே என்பான். அல்லாஹ் சுப்ஹானஹுவதஆலா கூறுவான், என் அடியானே, நான் உலகிலும் உன்னுடைய அந்த பாவங்களை மன்னித்து வைத்தேன், இன்று மறுமையிலும் அதை உனக்காக மறைத்துவிட்டேன் என்பான்.

ஒரு அடியான் தன் மேல் 'ஸித்ர்' (பாவங்களை மறைக்கும் திரை) இட்டு தன்னை பாதுகாக்கும் வரை அல்லாஹ்வும் அவனின் ஸித்ரை பாதுகாப்பான். எனவே ஒரு பாவம் அல்லது தீங்கு செய்துவிட்டீர்களென்றால், அல்லாஹ்விடம் பாவமன்னிப்பு தேடுங்கள், இஸ்தக்ஃபார் செய்யுங்கள், அந்த பாவத்தை விட்டுவிட்டு முன்னேறிச் செல்லுங்கள். அல்லாஹ்விடம் நேர்மையுடன் இஸ்தக்ஃபார் செய்திருந்தாலும், பாவத்தை விட்டுவிடும் நோக்கத்துடன் தவ்பா செய்திருந்தாலும் அல்லாஹ் அனைத்து பாவங்களையும் மன்னிக்க தயாராக இருப்பான்.

என்னுரை:
நம்மில் பல பேர் செய்கின்ற பெரிய தப்பு என்னவெனில், செய்த பாவத்தை விளையாட்டாகவோ அல்லது அதற்கு பரிகாரம் தேடும் சாக்கிலோ அல்லது என்ன செய்வதென்றே தெரியாமலோ எல்லோரிடமும் சொல்லிவிடும் வேலையை செய்கிறோம். பாவத்திற்கு இட வேண்டிய திரையை நாமே அழித்து விடுகின்றோம். இதுதான் நாம் செய்யும் மிகப் பெரிய தவறு. பாவத்தை விட மனம் கொள்வதும், செய்த பாவத்தினை அல்லாஹ்விடம் மட்டுமே சொல்லி பாவமன்னிப்பு தேடுவதும், அதனை விட்டு விலகுவதுமே நம்மை தூய்மடைய செய்யும். எனவே அல்லாஹ் நம்மை தூய்மையாக்க முயற்சிக்கையில் நாமும் தூய்மையடைய மனதார விரும்புவோம். இன்ஷா அல்லாஹ் இந்த ரமதானில் அல்லாஹ் நம்மை தூய்மைபடுத்த நாம் எடுக்கும் முயற்சிகளில் கை கொடுப்பானாக. ஆமீன்.




.

read more "25 வாக்குறுதிகள் - எட்டாம் வாக்குறுதி"

இன்றைய மேற்கோள்

இதயத்தின் தூய்மை

இதயம் நோய்படக்கூடும், அதனால் உடலும் நோயுறும், மேலும் அதன் நிவாரணம் தவ்பாவும்(பாவ மன்னிப்பு கோருதல்), பாதுகாப்பும்(வரம்பு மீறுதலிலிருந்து) ஆகும். ஒரு கண்ணாடி துருபிடிப்பதைப் போலவே இதயமும் துர் பிடிக்கின்றது, மீண்டும் அதை தெளிவாக்க அல்லாஹ்வின் நினைவு உதவிடும். உடல் நிர்வாணமடைவதைப் போலவே மனதும் நிர்வாணமடைகின்றது, அதனை அழகாக்க தக்வா(அல்லாஹ்வை அஞ்சுதல்) உதவிடும். வயிற்றுக்கு பசிப்பதைப் போலவே இதயத்திற்கும் வசியும் தாகமும் ஏற்படும், அதன் உணவும் நீரும் இல்மும், அன்பும்(அல்லாஹ்விற்காக), அல்லாஹ்வை சார்ந்திருப்பதும், தவற்றிற்கு வருந்துவதும் மற்றும் அடி பணிவதுமாகும்(அல்லஹ்வின் சட்டங்களுக்கு)

இப்னுல் கய்யிம் அல் ஜவ்ஜிய்யாவின் 'அல் ஃபவாயித்' எனும் புத்தகத்திலிருந்து.







.

read more "இன்றைய மேற்கோள்"

25 வாக்குறுதிகள் - ஆறாம் வாக்குறுதி

அல்லாஹ்வின் அளவிட இயலா கருணை 'அர் ரஹ்மா'

அல்லாஹ் சுப்ஹானஹுவத ஆலா தன் திருமறையில்

"ஆகவே, எவர்கள் ஈமான் கொண்டு நல்லமல்கள் செய்து வந்தார்களோ, அவர்களை அவர்களுடைய இறைவன் தன் ரஹ்மத்தில் பிரவேசிக்கச் செய்வான்; அதுவே தெளிவான வெற்றியாகும்."(திருமறை 45:30)

என்று கூறுகின்றான்.

விளக்கவுரை:
அல்லாஹ்தான் அர்-‍ரஹீம்(மிக்க கருணையுடையவன்). ஒரு சராசரி மனிதனை நாம் ரஹீம் அல்லது கருணை மிக்கவன் என்றும் கூறலாம். ஆனால், அல்லாஹ்வின் கருணையும் அதன் தரமும் அலாதியானது. அல்லாஹ்வின் மேன்மைக்கேற்றவாறே அல்லாஹ்வின் கருணையும். அல்லாஹ்வின்,"இறைவன் தன் ரஹ்மத்தில் பிரவேசிக்கச் செய்வான்...", எனும்  கூற்றான‌து, முஃமின்களை கருணையின் உச்சத்திற்கு கொண்டு செல்வதை குறிப்பிடுகின்றது. இதே போல் ஒரு ஹதீத்தில் ரசூலுல்லாஹ் (ஸல்) அவர்கள் கூறியுள்ளதையும் கவனிக்கலாம், "அல்லாஹ்வின் கருணையன்றி யாரும் சுவனத்தில் நுழைய முடியாது."

என்னுரை:
ஆலிம்களின் கருத்தின்படி அல்லாஹ்வின் இரு வேறு பெயர்களான அர்‍-ரஹ்மானுக்கும், அர்-‍ரஹீமிற்கும் சில வேறுபாடுகள் உள்ளன. இரண்டும் கருணையையே குறிப்பிடுவன என்றாலும், அர்-ரஹ்மான் எனும்பொழுது அகில உலகத்திற்கும் கருணை செலுத்துகின்ற இறைவன் என்று பொருள். அஃதாவது, அல்லாஹ்வை நம்பியவர்களுக்கும் சரி, நம்பாதவர்களுக்கும் சரி ஒன்று போல அனைவருக்கும் கருணையை பொழிபவன். ஆண், பெண், முஸ்லிம், முஸ்லிமல்லாதவர், பிராணிகள் என சகல ஜீவராசிகளுக்கும் கருணை புரிவதே அர்-ரஹ்மானின் பொருளாகும். ஆனால் அல்லாஹ் சுப்ஹானஹுவத ஆலா இந்த வசனத்தில் உபயோகிப்பது அர்-‍ரஹீம் என்னும் பெயரை. இதன் பொருள் என்னவெனில், தனிப்பெருங்கருணையாகும். அஃதாவது அல்லாஹ்வின் இன்னொரு சிறப்பு மிக்க கருணை, முஃமின்க‌ளுக்கு மட்டும். ஆகிரத்தில் இந்த கருணை வெளிப்படும் இன்ஷா அல்லாஹ். இந்த கருணையே நம் அனைவரையும், கடலளவு, கடலின் நுரையளவு பாவமிருந்தாலும் அல்லாஹ்வினிடத்தில் பாவமன்னிப்பும் சுவனத்தையும் பெற்று தரும். இந்த தனிப்பெருங்கருணையே அர் ரஹீமின் வடிவமாகும். அல்லாஹ் இந்த கருணையையே மகத்தான, தெளிவான வெற்றி என்கிறான். இந்த தனிப்பெருங்கருணை கிட்ட நாம் செய்ய வேண்டியதெல்லாம் பலமான ஈமான் கொள்வதும், அதன் மேல் அமல் செய்வதும்தான். செய்வோமா?

read more "25 வாக்குறுதிகள் - ஆறாம் வாக்குறுதி"

இன்றைய து'ஆ

"யா அல்லாஹ், (கியாமத் நாளில்) என்னுடைய கேள்வி கணக்கை எளிதாக்குவாயாக."

(ஆதாரம்: மஸ்ததர் ஹாகிம்; இமாம் அஹ்மது(ரஹி)வும், இமாம் ஹாகிம்(ரஹி)உம் இதனை 'ஸஹீஹ்' என்று அங்கீகரித்துள்ளார்கள். இமாம் அத் தஹாபியும்(ரஹி) அதை ஆமோதித்துள்ளார்.)

• தமிழில்: அல்லாஹும்ம ஹாஸிப்னி ஹிஸாபய்ன் யஸீறா
• ஒலி வடிவில் கேட்க இங்கே கிளிக்கவும். (Real Player Format)

.

read more "இன்றைய து'ஆ"

இன்றைய ஹதீத்

அல்லாஹ்வின் தூதர்(ஸல்) அவர்கள் மிம்பரின் மீது ஏறினார்கள். ஆமீன் ஆமீன் ஆமீன் என்று கூறினார்கள். ஏன் இவ்வாறு செய்கிறீர்கள் என்று அல்லாஹ்வின் தூதர் அவர்களிடம் கேட்கப்பட்டது.

அதற்கு, "ஜிப்ரீல் (அலை) அவர்கள், எந்தவொரு அடியான் ரமலானை அடைந்தும் அவனது பாவம் மன்னிக்கப்படவில்லையோ அவனது மூக்கு மண்ணை கவ்வட்டும்* என்று கூறினார்கள். அதற்கு நான் ஆமீன் என்றுக் கூறினேன். பிறகு எந்த அடியானிடத்தில் என்னைப் பற்றி சொல்லப்படும் போது அவன் என் மீது ஸலாம் கூறவில்லையோ அவனுடைய மூக்கு மண்ணை கவ்வட்டும்** என்று கூறினார்கள் அதற்கு ஆமீன் என்று கூறினேன். எந்த அடியான் தனது தாய் தந்தையையோ அல்லது இருவரில் ஒருவரையோ பெற்றிருந்தும் சொர்க்கம் செல்லவில்லையோ அவனது மூக்கு மண்ணைக் கவ்வட்டும்*** என்று கூறினார்கள். அதற்கு நான் ஆமீன் என்று கூறினேன்" என்று பதிலளித்தார்கள்.

அறிவிப்பவர் : அபூஹுரைரா(ர­)
நூல் : பைஹகீ (8767)

* ரமதான் மாதத்தையும் பிற மாதத்தைப் போல எண்ணி அதில் அதிகதிகமாக நற்செயல்கள் செய்யாமலும், அல்லாஹ்விடம் பாவமன்னிப்பு தேடும் இபாதத்துகளை செய்யாமலே காலம் கடத்தியவனும் ஆவான்.

**ந‌பிகள் நாயகம் (ஸல்) அவர்களின் பேரை சொல்லும்பொழுதெல்லாம் மற்றும் கேட்கும் பொழுதெல்லாம், ஸல்லல்லாஹு அலைஹி வ ஸல்லம் என்று கூறவேண்டியது கடமை. அதை தவற விட்டவன் / அலட்சியம் செய்தவன்.

*** தன்னுடைய தாய் தந்தை வயோதிகர்கள் ஆன பின்னரும் அவர்களை தகுந்த முறையில் கவனிக்காமல், பாதுகாக்காமல், சொல் கேளாமல், மதிக்காமல் விட்டவன்.



.

read more "இன்றைய ஹதீத்"

இன்றைய திருக்குர்'ஆன் வசனம்

"எவர்கள் அறியாமையினால் தீமை செய்துவிட்டு, பின்னர் விரைவில் மன்னிப்புத் தேடி கொள்கிறார்களோ அவர்களுக்குத்தான் அல்லாஹ்விடத்தில் மன்னிப்பு உண்டு. அல்லாஹ் அவர்களின் மன்னிப்பை ஏற்றுக்கொள்கிறான். இன்னும் அல்லாஹ் நன்கறிந்தோனும். ஞானம் உடையோனுமாக இருக்கின்றான்." (ஸூரத்துன்னிஸா : 17)

.

read more "இன்றைய திருக்குர்'ஆன் வசனம்"

சிந்தனைக்கு இன்று...

மகிழ்ச்சியும், கஷ்டமும், அடி பணிவதும் மற்றும் பாவமும்

வுஹைப் பி அல் வார்த்(ரஹி) கூறியதாவது,"திண்ண‌மாக எப்பொழுது அல்லாஹ் ஓர் அடிமையை மேன்மைபடுத்த விரும்புகின்றானோ(அவனின் நல் அமல்களுக்காக), பின் அல்லாஹ் அவனின் வாழ்வாதாரத்தில் குறை ஏற்படுத்துகின்றான், அவனின் உடலில் நோயை ஏற்படுத்துகின்றான் மேலும் பயம் கலந்த ஓர் வாழ்வை அவனுக்கு தருகின்றான்(இவையனைத்தும் அவனின் பாவங்களை அழிக்கின்றன). மரணம் வரை வாழ்வு இப்படியே இருக்கின்றது, பின்பும் ஏதேனும் பாவங்கள் மிச்சமிருப்பின் அவற்றிற்காக வேண்டி மரண நிமிடங்களை கடுமைப்படுத்துகின்றான், இதனால் அல்லாஹ்வின் முன் செல்லும் வேளையில் அந்த அடியானிடம் பாவங்கள் எதுவும் மிஞ்சுவதில்லை.

அதே போல், எந்த அடியான் அல்லாஹ்வின் முன்னால் ஒரு பொருட்டும் இல்லையோ(அவனின் அடிபணியாத குணம் மற்றும் தீய அமல்களினால்) அவனுக்கு அல்லாஹ் நல்ல உடல்நிலையை தருகின்றான், அவனுடைய வாழ்வாதாரத்தை பெருக்குகின்றான், நம்பிக்கையான் ஒரு வாழ்வை அவனுக்கு தருகின்றான்(இதன் மூலம் அவனின் எல்லா நல் அமல்களுக்கும் இந்த வாழ்விலேயே கூலி கிடைத்து விடுகின்றது) மரணம் வரை வாழ்வு இப்படியே இருக்கின்றது. பின்பும் ஏதேனும் நல் அமல்கள் மிஞ்சினால் அல்லாஹ் அவனுடைய மரண நிமிடங்களை எளிதாக்குகின்றான் இதனால் அல்லாஹ் முன் செல்லும் வேளையில் அந்த அடியானிடம் நல் அமல்கள் எதுவும் மிஞ்சுவதில்லை"

'அபூ பக்ர் அத் தய்னூரி, அல் முஜாசலாஹ் வ ஜவாஹிர் அல் இல்ம்' இதழ் கட்டுரை எண்:2865.



.

read more "சிந்தனைக்கு இன்று..."